Qytetar Nderi i Pogradecit

 

"Në kuadrin e 45 vjetorit të lindjes, në Pogradec, më 20 gusht, nga Bashkia e atij qyteti, nën kujdesin personal të kryetarit të Bashkisë, zotit Artan Shkëmbi, iu dorëzua titulli “Qytetar Nderi” shkrimtarit të shquar Ardian-Christian Kycyku (pseudonimi letrar i Ardian Kyçykut).

Shkrimtar sa në gjuhën shqipe, aq edhe në atë rumune (mbi 35 libra në gjuhët shqip e rumanisht), botues, - bashkë me të atin, akademikun Kopi Kyçyku, - i Revistës Evropiane Haemus, rektor i Universiteti Rumun të Shkencave dhe Arteve “Gheorghe Cristea” të Bukureshtit, Ardian Kyçyku është i njohur në jo vetëm në hartat kulturore rumanisht e shqipfolëse por, i përkthyer në 12 gjuhë, ai ka arritur të bëhet ndjeshëm i preferuar nga lexuesit elitarë në tërë kontinentin europian.

"Home" në Berlin

LiteraturHaus Berlin

Në datën 4 shtator 2014, në hapësirat e LiteraturHaus të Berlinit u paraqit romani “Home” i Ardian-Christian Kyçykut. Shfrytëzuam rastin dhe zhvilluam me autorin një bisedë të shkurtër në lidhje me romanin, leximin, idetë që dolën nga ky takim letrar. Mbrëmja letrare u organizua nga Shtëpia Botuese PA me seli në Prishtinë dhe Berlin, e drejtuar nga zonja Feride Berisha, dhe u mbështet pjesërisht nga Ambasada e Republikës së Kosovës në Gjermani.

Zëri: I nderuari z. Kyçyku, ju gjetëm sonte këtu në hapësirat e LiteraturHaus Berlin me rastin e paraqitjes së romanit tuaj “Home”, të cilin kësaj vere e botoi shtëpia botuese PA. Si e ndjeni veten këtu në mesin e shqiptareve që jetojnë në Berlin? Cila është përshtypja e parë?

Botuesja Feride Berisha dhe A.-Ch. Kyçyku

Ardian-Christian Kyçyku: U ndjeva në shqip, ose njëlloj sikur të qemë mbledhur në një libër të këndshëm. Nuk qe e rastit që pikërisht romani “Home” e krijoi këtë mundësi. Në krye të librit kam shkruar se të gjitha ngjarjet që pasojnë mbështeten në një libër të vërtetë. Gjithmonë më është dukur se, kur shumë ngjarje dynden të hyjnë në libra, disa të tjera dalin nga një libër i pashkruar i Mërgimit shqiptar dhe fitojnë njëfarë jete të mëvetësishme. Mikpritja e shqiptarëve të Berlinit, përkushtimi i botueses, zonjës Feride Berisha, bisedat, shija e takimit letrar janë mbresëlënëse, sidomos në kohëra kaq të vështira për letërsinë e mirëfilltë. Nga ana tjetër, qyteti është nga ata të paktët ku shumë shpejt bindesh se jeton prej vitesh.